《當你覺得「就算係放題，都唔使食太飽啫」嘅時候》
我十幾歲嗰時，成班朋友每隔幾個月，就會搞一次「豪食團」。
講落好巴閉，感覺會好豐富，
但其實只係一餐每人200蚊落到樓嘅「放題」。
收200蚊就畀你任飲任食，食物質素自然都控制喺「正常」水平。
所謂「正常」，即係有啲味道，未至於入唔到口，但唔會令你Chok一個飲食節目嘅誇張好食樣出嚟。
呢種質素同大部份人嘅人生格言差唔多，都係「不求有功，但求無過。」
但沒關係，嗰時我哋儲好錢，
一坐底，已經進入戰鬥狀態，仲附帶一種對抗心態！
對抗啲咩？對抗「放題」囉。
好得意，你畀低200蚊任食，個心就想食超過200蚊價值。
冇錯，你想食窮間放題。
雖然呢個意念除咗令你畀錢爽啲之外，別無用處。但年輕就是充斥一點戇。
所以我哋食得快，仲食得狠！
為咗令個胃有足夠嘅戰鬥空間，我哋甚至頒佈一條「放題不得剔壽司」嘅終極命令！
緊係啦！壽咩司啫！一嚟就刺身啦！
即使已經好飽，即使去到極限，我哋仍然追求突破，
夾硬塞落個口度，將享受化成痛苦，先肯收手。
喺嗰個年紀，提起任食，大家都會豁條命出去。
直至近年，一班朋友再次去呢種200蚊放題，
席間竟然有人喺「壽司」一欄劃上剔號。
眼前唔對路，我即時制止：
「喂，係都剔刺身啦。壽司會好快飽！」
佢呆一呆，之後笑一笑：
「飽咪停手囉，仲細咩？」
一句「仲細咩」挑動起我嘅神經，
睇嚟佢已經忘記咗以前喺放題戰場上，大家都曾經拋過浪頭，灑過豉油。
佢已經離地了！
正當我想嚟一場激烈舌戰之際，佢繼續講多幾句：
「細細個就搏命食啫，而家你都應該清楚，食得太多，受苦嘅咪又係自己。
飽得濟消化唔到又辛苦，食錯嘢腸胃又發炎。
以前為200蚊搏命，係因為要畀200蚊真係擺你命呀嘛。
家陣你老哥返一日工都唔止呢個數啦。
既然係咁，啱啱好咪算，何必逼自己跟住以前嘅玩法，貼錢買難受？」
聽完佢講之後，再望下個肚腩仔，
我似乎都感覺到大家的確唔再細個。
原來有啲嘢已經唔使咁執著，
我哋早就走過咗「執著期」，
依然執著，只係你冇放過自己。
之後，無論自助餐定放題，我仲係會食多少少，
但Feel到真係飽就會停手，留下一句「多謝款待」就走。
諗返轉頭，無論當年點樣喪食，我哋都冇成功食窮過間放題。
根本幾執著都好，我哋一次都冇贏過。
IG: cheungson88
Search